“Зенга-Зенгана” навли қулупнайнинг иккинчи мавсуми ҳам пишди

Қулупнай ер шарининг турли иқлимли минтақаларида – қутб доирасидан то субтропикларгача ўстирилади. Мевасининг мазаси, парҳез учун истеъмол қилиниши, технологик сифати ва рангининг чиройлилиги жиҳатдан юқори баҳоланади. Қулупнай мевали ўсимликлар ичида энг эрта пишадиган, яъни мавсумнинг илк мевасидир. Янги териб олинган меваси жуда мазали ва хушбўй бўлади. Шунинг учун ҳам қулупнай Ўзбекистонда етиштириладиган резавор мевалар ичида биринчи ўринда туради.

Кейинги йилларда Каттақўрғон туманида ҳам қулупнай экин майдонлари тез суръатларда кенгаймоқда. Шу кунларда “Каттақўрғон клубника” ишлаб чиқариш корхонасига қарашли дала майдонларда Польша мамлакатидан келтириб экилган “Зенга-Зенгана” навли клубниканинг иккинчи мавсуми ҳам пишиб етилди. 
Маълумот ўрнида шуни айтиш керакки, “Каттақўрғон клубника” ИЧК томонидан жорий йилда 500 гектар очиқ майдон ва 500 гектар аҳоли томорқаларида ҳам қулупнайнинг “Зенга-Зенгана” навини экиш режалаштирилган бўлиб, шу кеча-кундузда қулупнай экиш ишлари авжида.    Украина давлатидан келган тажрибали мутахассис Евгин Егоров томонидан деҳқонларимизга қулупнай ниҳолини экиш ва унга ишлов беришга оид тегишли кўрсатмалар бериб борилмоқда. 
Қулупнайнинг бу тури маҳаллий шароитда етиштириладиган қулупнайлардан бир йилда икки марта ҳосил бериши билан ҳам аҳамиятлидир.