КАТТАҚЎРҒОН ТУМАНИДА ҲОСИЛ БАЙРАМИ КАТТА ТАНТАНА БИЛАН НИШОНЛАНДИ

Президентимизнинг ташаббуси билан мамлакатимизда декабрь ойининг иккинчи якшанбаси – “Ўзбекистон Республикаси қишлоқ хўжалиги ходимлари куни” этиб белгиланган бўлиб, ушбу сана юртимизнинг барча ҳудудларидаги каби Каттақўрғон туманида ҳам катта тантана билан ўтказилди.

Халқимизнинг энг яхши фазилатлари хусусида гап кетганда, ота-боболаримизнинг меҳнаткашлиги ва миришкорлиги, ер илми ҳадисини олганликлари алоҳида эътироф этилиши бежиз эмас.

Айнан қишлоқ хўжалиги соҳасида Каттақўрғонда ўзига хос тажриба мактаби яратилган бўлиб, деҳқончиликнинг муҳим қадрият ва анъаналари асрлар мобайнида авлоддан-авлодга ўтиб сайқалланиб келмоқда.

Кейинги йилларда қишлоқ хўжалиги тармоқлари истиқболини таъминлаш, хусусан, пахта ва ғалладан юқори самарадорликка эришиш борасида сифат жиҳатдан янги босқичга қадам қўйди. Туман деҳқонлари ҳам баракали ҳосил етиштириш мақсадида йил бўйи самарали меҳнат қилди.

Хусусан, 2021 йилнинг ўтган даври мобайнида 66.8 минг тоннадан ортиқ ғалла, 36.6 минг тоннадан зиёд пахта, 328 тонна пилла, 13407 тонна гўшт, 99.8 минг тоннага яқин сут ва 6317 тонна балиқ маҳсулотлари йиғиштириб олинди.

 

Ўз навбатида ризқ-рўзимиз манбаи бўлган қишлоқ хўжалиги маҳсулотларини етиштирувчи уста бободеҳқонларимизга юксак ҳурмат кўрсатиш, ҳамиша сидқидилдан қилинган меҳнатларини эъзозлаш халқимизнинг энг эзгу фазилатлари сирасига киради.

 

Каттақўрғон тумани “Роял” базмгоҳида бўлиб ўтган тадбирда қишлоқ хўжалиги ходимларининг меҳнати яна бир бор эътироф этилиб, туман ҳокими Ж.Насриддинов барча қишлоқ хўжалиги ходимларини байрам билан қутлади. Қишлоқ хўжалиги соҳасида ўз меҳнати билан яхши кўрсатгичлар ва натижалар қайд этганлар кўкрак нишони, фахрий ёрлиқ ва эсдалик совғалари билан тақдирланишди.

Элимиз суйган санъаткорлар томонидан намойиш этилган концерт дастури барчага завқу-шавқ улашди. Қишлоқ хўжалигида улкан марраларни забт этган каттақўрғонликлар байрамни ана шундай кўтаринки руҳ, хуш кайфият билан нишонлади.