Каттақўрғон туманининг Мойбулоқ аҳоли массивидаги кенг адирликларда 18 март куни туманнинг янгиланиш ва ёшариш фасли Наврўз шодиёналари катта тантана билан нишонланади.

Умумхалқ сайли тариқасида ўтадиган байрам халқимизнинг қадимий ва миллий анъана ва удумларига хос тарзда ўтилиши кутилмоқда. Наврўз умумхалқ сайлида миллий ўйинлар бўйича ўзаро беллашувлар, миллий кураш ва кўпкари соврини учун ҳам катта томошалар бўлади.

Юртимизда аҳоли турмуш тарзи, ҳаёт даражаси ва фаровонлигини янада ошириш борасида амалга оширилаётган ишлар кўлами тобора кенгаймоқда. Бугун қишлоқларни кезган кишининг кайфияти кўтарилади. Зеро, эзгу ният, иштиёқ ва зўр ғайрат-шижоат билан уй қураётган, ерга меҳр бериб ишлаётган, ундан мўл ҳосил олиб даромадини ошираётган, оила, маҳалла ва эл-юрт дастурхонининг тўкин бўлишига муносиб ҳисса қўшаётган юртдошлармизга ҳавас қилсак арзийди.

Айни пайтда мамлакатимизда халқимизнинг севимли айёми, тарихи узоқ минг йилликларга тенгдош Наврўз байрамини кўтаринки кайфиятда нишонлаш юзасидан зарур чора-тадбирлар амалга оширилмоқда. Жумладан туманимизда ҳам бу борада аллақачон тараддуд бошланиб кетган.